മാറ്റം

തെളിനീരോഴുകിയിരുന്നു,
പണ്ടൊരു നാള്‍, ഈയാറില്‍.
നീലപ്പൊന്മകള്‍ പാറിനടന്നിരുന്നു,
പരല്മീനുകളനവധി
നീന്തിത്തുടിച്ചിരുന്നു.
കൊറ്റികളൊറ്റക്കാലില്‍ നിന്ന്
തപസ്സ് ചെയ്യുമായിരുന്നു.
മുളങ്കാടുകളെന്നും പൂത്തുലഞ്ഞു.
ഓണക്കാലത്തെ അവധിക്കു
സഹോദരങ്ങള്‍ക്കൊപ്പം
ചൂണ്ടയുമായി ഞാനും പോയിരുന്നു,
മീനുകളൊന്നും കിട്ടിയില്ലെങ്കിലും.
പുഴയില്‍ ആര്‍ത്തുല്ലസിച്ചു,
കടത്ത് തോണിയില്‍
കളിച്ചു രസിച്ചു.

ഇന്ന്,

സഹോദരങ്ങളില്ലിവിടെ,

അവര്‍ ദൂര ദേശങ്ങളില്‍.

അവധികള്‍, ഉറങ്ങിത്തീര്‍ക്കാന്‍.

പുഴയില്‍ കളിയുമില്ല, കുളിയുമില്ല!

മുളങ്കാടുകള്‍ വെട്ടിമാറ്റപ്പെട്ടു,

കൊറ്റികള്‍ തപ്സ്സുനിര്‍ത്തി.

പരല്മീനുകള്‍ ചത്തു പൊന്തി.

പൊന്മകള്‍ തീറ്റതേടിയലഞ്ഞു

പിന്നെ, പാറിയകന്നു പോയി.

തെളിനീര്‍ പുഴക്കിന്നു

പെട്രോള്‍ നിറം പകര്‍ന്നു.

സൂര്യരശ്മികളേറ്റതു

മിന്നിത്തിളങ്ങി നില്‍ക്കുന്നു.

മണല്‍ ലോറികളും

കഴുകുന്ന വാഹനങ്ങളും

പുഴയെ കൊന്നു തിന്നുന്നു.

ഇത് ഗ്രാമീണതയില്‍ നിന്നും

നാഗരികതയിലേക്കുള്ള മാറ്റമെന്നു

ആശ്വസിക്കുന്നു ഈ സമൂഹം.

എന്നാലും ഒരു നെഞ്ചിടിപ്പ്,

മാറ്റം സ്വാതന്ത്ര്യത്തില്‍ നിന്നും

അടിമത്തത്തിലേക്കാകുമോ?